Det er masterstudenten Tonje Froastad som står for prosjektet i faget visuell kommunikasjon ved Universitet i Bergen. Bjørnar Gjerde og Torunn Lutro overtok garden i 2017 og flytta i oktober 2021 inn i ein heilt ny driftsbygning.
Slik kan omgjevnadane spela inn på bondevelferda
I prosjektet ser Froastad på kva verdi fargepsykologi og illustrasjonar kan ha som ein integrert del av omgjevnadane våre.
- Forsking viser at omgjevnadane me er i påverkar både humør, helse og velvære. I tillegg til vårt eige velvære påverkar òg omgjevnadane korleis me oppfattar og behandlar menneske rundt oss, seier Frostad.
Prosjektet starta på barne- og ungdomsklinikken på Haukeland sjukehus, der born var målgruppa. Forsking syner at fargar me omgir oss med kan gje helsefordelar. Då dukka spørsmålet opp om fargar òg påverkar produksjonsdyr.
-Eg fokuserte mykje på kva fargesyn kyr har. Kyr ser ikkje raudt og oransje, dei lengste bølgjelengdene i lyset. Om dei ser lilla er uvisst, men mest truleg ser dei nyansar av grønt og blått, seier Frostad.
Kunst og kunnskap om næringa
Dyrevelferd har stått i sentrum gjennom byggjeprosessen og det er veldig kjekt å kunna visa fram resultatet. Om fargar og illustrasjonar påverkar dyrevelferda er kanskje vanskeleg å måla, men vi veit at bondevelferd er viktig for dyrevelferd.
-Me tykte dette var eit spennande prosjekt, og det gjev ein ekstra dimensjon for dei som vil sjå kva me driv med. Det er òg eit mål å gje besøkjande auka innsyn og kunnskap om det som skjer innanfor fjøsdøra. Det er viktig for at samfunnet skal verdsetja oss slik me fortener, meiner Bjørnar.
Les også om kunstfjøset i Bondebladet
Foto: Bjørnar Gjerde